Persatuan Tarbiyah Islamiyah

Persatuan Tarbiyah Islamiyah

Lambang Persatuan Tarbiyah Islamiyah sasudah Muktamar Islah pado 2016
Singkatan	PERTI
Pambantuakan	5 Mei 1928
Jinih	Organisasi massa Islam
Tujuan	Pendidikan, dakwah, jo sosial
Ketua Umum	Drs. H. M. Syarfi Hutauruk, MM
Sekretaris Jenderal	Drs. Zulhendri Chaniago, MM
Laman web	tarbiyahislamiyah.id

Persatuan Tarbiyah Islamiyah (Jawi: ڤرستوان تربيه اسلاميه; bahaso Arab: اتحاد التربية الإسلامية‎ Ittiḥād at-Tarbiyah al-Islāmīyah) atau PERTI adolah organisasi massa Islam di Indonesia. Persatuan Tarbiyah Islamiyah marupoan organisasi Ahlussunah wal Jamaah nan bamazhab Syafi'i, akidahnyo Asy'ari, jo batarekat. Cikal bakal organisasi iko bamulo dari Persatuan Madrasah Tarbiyah Islamiyah nan ditagakan dek Syekh Sulaiman ar-Rasuli pado 5 Mei 1928 di Canduang jo dalam pakambangannyo sempat manjadi partai politik banamo Partai Islam PERTI.

Perti ikuik bajuang di dunia politik jo bagabuang ka dalam GAPI dalam aksi Indonesia Beparlemen, sarato turuik maagiah konsepsi kanagaraan kapado Komisi Visman pado taun 1939. Mamasuki taun 1944, pamimpin-pamimpin Perti malakukan gebrakan jo bagabuang ka Majilih Islam Tinggi (MIT) di Bukittinggi, suatu organisasi Islam untuak saluruah Sumatera nan dikapaloi dek Syekh Muhammad Djamil Djambek, surang ulama modernis nan pado maso lalu panah basitagang jo ulama tuo Perti.

MIT marupokan tampek untuak marujuak pasoalan-pasoalan agamo, tapi salamo Parang Pasifik, organisasi ko kurang dapek bafungsi sacaro elok. Pado bulan Desember 1945, MIT barubah manjadi Masyumi cabang Sumatera saubuangan jo edaran pamarintah sabalunnyo supayo rakyaik mandirian partai politik sabagai camin palaksanaan demokrasi.

Pado periode nan samo pulo Perti mamutuihan untuak manjadikan organisasinyo suatu partai politik surang. Kaputusan tasabuik diambiak pado tangga 22 November 1945, dan dipakuek dek kongres di Bukittinggi tanggal 22-24 Desember 1945.

Dalam Pemilihan Umum 1955, Perti mandapekan ampek kursi DPR RI jo tujuah kursi Konstituante. Salapeh Konstituante jo DPR hasia Pemilu dibubaran dek Presiden Soekarno, Perti mandapek duo kursi di DPR-GR. Duo tokoh kunci Perti juo panah dipicayo manjabaik mantari nagara pado maso pamarintahan Soekarno. Kaduo ulama tasabuik adolah Sirajuddin Abbas sabagai Mantari Kasalamatan Nagara RI jo Rusli Abdul Wahid sabagai Mantari Nagara Urusan Umum jo Irian Barat.

Pado maso Orde Baru Perti bagabuang jo Partai Persatuan Pembangunan.